Dastuurka JFS (A Citizen’s Initiative)
Home Constitution Blog Authors
CUTUBKA 8: XUKUUMADDA FEDERAALKA SOOMAALIYA
(CHAPTER 8: THE FEDERAL GOVERNMENT OF SOMALIA)
Somali (Original)

Qodobka 124aad: Xilkaqaadidda Ra'iisulwasaaraha iyo Golaha Wasiirrada

(1) Hindisaha xilkaqaadista Ra'iisulwasaaraha, waxaa soojeedin kara ugu yaraan shan meelood meel (1/5) tirada xubnaha Golaha Shacabka, halka xilkaqaadista xubin ka mid ah golaha wasiirrada ay soojeedin karaan toban (10) xildhibaan oo Golaha Shacabka ah, si waafaqsan Qodobka 92aad, faqraddiisa 2aad ee Dastuurka.

(2) Guddoonka Golaha Shacabku waa in hindisaha xilkaqaadista ku horgeeyaa fadhiga guud ee Golaha Shacabka muddo toddoba (7) maalmood gudahood oo maalmo shaqo ah.

(3) Golaha Shacabka waa in go'aan uga gaaraa soojeedinta xilkaqaadista ugu badnaan muddo shan iyo toban (15) maalmood ah iyadoo cidda uu hindisaha khuseeyo la siinayo fursad uu isku difaaco Golaha Shacabka hortiisa.

(4) Haddii Golaha Shacabka ay cod gacan taag ah aqlabiyad boqolkiiba konton iyo hal dheeri (50%+1) ah tirada guud ee xubnahiisa ugu codeeyaan xilkaqaadista ra'iisulwasaaraha, golaha wasiirrada ama xubin ka tirsan golaha wasiirrada: (a) Haddii ay xilkaqaadistu khuseyso Ra'iisulwasaaraha, Madaxweynaha Jamhuuriyadda wuxuu soo magacaabayaa Ra'iisulwasaare cusub si waafaqsan Qodobka 110(1) ee Dastuurka. (b) Haddii xilkaqaadistu ay khuseyso xubin ka tirsan golaha wasiirrada, ra'iisulwasaaraha wuxuu soo magacaabayaa xubin buuxisa xilka bannaanaaday si waafaqsan Qodobka 120 (2) ee Dastuurka.

English

No translation available yet in English.

Plain-Language Explanation

Somali
Ugu yaraan shan meelood meel (1/5) xubnaha Golaha Shacabka ayaa soo jeedin kara in xilka laga qaado Ra’iisul Wasaaraha. Sidoo kale, toban xildhibaan ayaa soo jeedin kara in xilka laga qaado wasiir ka tirsan Golaha Wasiirrada, iyadoo la raacayo Dastuurka. Guddoonka Golaha Shacabka waa inuu soo jeedinta xilkaqaadista horgeeyaa fadhiga guud ee Golaha muddo toddoba maalmood oo shaqo gudahood ah. Golaha Shacabka waa inuu go’aan ka gaaro soo jeedinta muddo aan ka badnayn 15 maalmood. Qofka xilkaqaadistu khusayso waa in la siiyaa fursad uu isku difaaco hortiisa. Haddii in ka badan kala bar xubnaha Golaha Shacabka, oo lagu daray hal cod (50%+1 tirada guud ee xubnaha), ay cod gacan taag ah ku taageeraan xilkaqaadista, waxaa dhacaya sidan: - Haddii xilka laga qaado Ra’iisul Wasaaraha, Madaxweynaha ayaa soo magacaabaya Ra’iisul Wasaare cusub, iyadoo la raacayo Dastuurka. - Haddii xilka laga qaado wasiir, Ra’iisul Wasaaraha ayaa soo magacaabaya qof cusub oo buuxiya booska bannaan.
English

Not available.

Questions & Comments (0)