(1) Xafiiska Xeer-ilaalinta Guud waxaa xil ka saaran yahay ilaalinta caddaaladda, ku dhaqanka xeerarka, difaacidda danaha shacabka iyo dawladda.

(2) Awoodaha xafiiska Xeer-ilaalinta Guud waxaa ka mid ah: (a) La dagaallanka iyo ka hortagga dembiyada federaalka; (b) Inuu dhaqaajiyo isla markaana oogo dacwadaha ciqaabta federaaliga ah; (c) Hoggaaminta baarista dembiyada federaaliga; (d) Inuu unko ama billaabo tallaabooyinka horgaynta eedaysanayaasha maxkamadaha hortooda; (e) Inuu qaato rafcaannada dacwadaha laga xukumo markay ay ku jirto danta caddaaladda; (f) Inuu maxkamadaha ku matalaa dadka taagta daran iyo carruurta agoonta ah; (g) Inuu ku kormeero hay'adaha baarista iyo saraakiisha booliiska federaalka shaqadooda la xiriirta baarista; (h) Inuu hago ama uu la wareego tallaabooyinka baariseed si waafaqsan danta guud; (i) Inuu hago iskuna xiro xafiisyada xeer-ilaalinta ee heerarka kala duwan ee dawladda; iyo (j) Inuu guto hawl kasta oo ay farayaan Dastuurka iyo xeerarka kale ee dalka.

(3) Xeer-Ilaaliyaha Guud ee Qaranka waxay mas'uuliyad gaar ah ka saarantahay: (a) Agoonta iyo dadka aan isdifaaci karin sharciga hortiisa; (b) Hubinta in eedda lagu gudbiyo muddada xeerku tilmaamay; iyo (c) Kormeeridda xabsiyada federaalka iyo goobaha sharcigu oggolyahay ee dadka lagu xiro ama lagu hayo.

(4) Xeer-ilaaliyaha Guud ee Qaranka waxa uu soo saari karaa habraacyo iyo hagayaal lagu fududeynayo shaqada xafiiska.